അടിപൊളി ടേസ്റ്റിൽ ട്യൂണ കട്ലറ്റ് തയ്യാറാക്കി എടുക്കാം വളരെ എളുപ്പത്തിൽ

കട്ലറ്റ് എല്ലാവർക്കും ഇഷ്ടമാകുന്ന ഒരു ഐറ്റം ആണ്. ഈ രീതിയിൽ കട്ലറ്റ് തയ്യാറാക്കി എടുക്കുകയാണെങ്കിൽ ഇഷ്ടമുള്ളാത്തവർ വരെ എന്തായാലും കഴിക്കും. ദശ കട്ടിയുള്ള ഏതു മീൻ വച്ചും ഈ രീതിയിൽ കട്ലറ്റ് റെഡി ആക്കി എടുക്കാം. വളരെ എളുപ്പത്തിൽ തയ്യാറാക്കി എടുക്കുകയും ചെയ്യാം. അപ്പോൾ എങ്ങിനെ ആണ് ഇത് തയ്യാറാക്കി എടുക്കുന്നത് എന്ന് നോക്കാം.

ആദ്യം അര കിലോ ട്യൂണ മീൻ നല്ലപോലെ വൃത്തിയായി കഴുകി എടുക്കുക. അതിനു ശേഷം അൽപ്പം മഞ്ഞൾപൊടിയും, ഉപ്പും ചേർത്ത് വെള്ളം ഒഴിച്ച് വേവിക്കുക. ഇനി ചൂടാറിയ ശേഷം വെള്ളം ഊറ്റി കളഞ്ഞു നന്നായി പൊടിച്ചു വക്കണം. ഇനി ഒരു പാൻ അടുപ്പിൽ വച്ചു ചൂടാക്കി അതിലേക്ക് നാലു സ്പൂൺ വെളിച്ചെണ്ണ ചേർക്കുക. ഇനി ഒരു സ്പൂൺ ഇഞ്ചി വെളുത്തുള്ളി പേസ്റ്റ് ചേർത്ത് നന്നായി വഴറ്റുക. അതിലേക്ക് രണ്ടു പച്ചമുളക് വട്ടത്തിൽ അരിഞ്ഞത്, രണ്ടു തണ്ട് കറിവേപ്പില അരിഞ്ഞത്, ഒരു സവാള ചെറുതായി കൊത്തിയരിഞ്ഞത് എന്നിവ ചേർത്ത് നന്നായി വഴറ്റുക. നന്നായി വാടി വന്നാൽ അതിലേക്ക് കാൽ സ്പൂൺ മഞ്ഞൾപൊടി, അര സ്പൂൺ മുളക്പൊടി, അര സ്പൂൺ കുരുമുളക്പൊടി, അര സ്പൂൺ ഗരം മസാല എന്നിവ ചേർത്ത് നന്നായി വഴറ്റുക.

പൊടികളുടെ പച്ചമണം മാറിയാൽ അതിലേക്ക് വേവിച്ചു വച്ചിരിക്കുന്ന മീൻ ചേർത്ത് നന്നായി മിക്സ്‌ ചെയ്യണം. നന്നായി വഴറ്റുക. ഇനി ഉപ്പ് ചേർത്ത് വേവിച്ചു ഉടച്ചു വച്ചിരിക്കുന്ന രണ്ടു ഉരുളൻ കിഴങ്ങ് കൂടി ചേർത്ത് നന്നായി മിക്സ്‌ ചെയ്യുക. അൽപ്പം മല്ലിയില കൂടി തൂവി തീ ഓഫ് ചെയ്യണം. ചൂടാറിയ ശേഷം അതിൽ നിന്ന് കുറേശ്ശേ എടുത്തു ചെറിയ ഉരുളകൾ ആക്കുക. ഇനി കയ്യിൽ വച്ചു തന്നെ പരത്തുക. കട്ലറ്റിന്റെ ഷേപ്പിൽ ആക്കി എടുക്കണം. ഇനി ഒരു പാൻ അടുപ്പിൽ വച്ചു ചൂടാക്കി മുക്കി പൊരിക്കാൻ ഉള്ള ഓയിൽ ചേർക്കുക. നന്നായി ചൂടായ ശേഷം ഓരോ കട്ലെറ്റും ആദ്യം മുട്ടയിൽ മുക്കി പിന്നെ ബ്രെഡ്‌ ക്രംസിൽ പൊതിഞ്ഞു എണ്ണയിൽ വറുത്തു കോരണം. ( ചെറിയ തീയിൽ വറുത്തു കോരാൻ പ്രത്യേകം ശ്രദ്ധിക്കണം. ഇപ്പോൾ നമ്മുടെ അടിപൊളി “ട്യൂണ കട്ലറ്റ്” റെഡി… !! ടൊമാറ്റോ സോസ് കൂടി ഉണ്ടെങ്കിൽ പ്ലേറ്റ് കാലിയാകുന്നത് അറിയുകയേ ഇല്ല.. !