വളരെ എളുപ്പത്തിൽ, നല്ല ടേസ്റ്റിയായ കപ്പ കട്ലറ്റ് തയ്യാറാക്കുന്ന രീതി കണ്ടിട്ടുണ്ടോ

കപ്പ കട്ലറ്റ് വളരെ എളുപ്പത്തിൽ തയ്യാറാക്കി എടുക്കാൻ പറ്റും. അതുപോലെ തന്നെ നല്ല ടേസ്റ്റ് ആണ് ഇത് കഴിക്കാൻ. കുട്ടികൾക്കും, മുതിർന്നവർക്കും ഇത് ഒരുപോലെ ഇഷ്ടമാകും. നാലുമണി നേരത്ത് ഇത് തയ്യാറാക്കിയാൽ പ്ലേറ്റ് കാലിയാകുന്നത് അറിയുകയേ ഇല്ല. അപ്പോൾ വളരെ പെട്ടന്ന് ഇതെങ്ങിനെ ആണ് തയ്യാറാക്കി എടുക്കുന്നത് എന്ന് നോക്കാം.

ആദ്യം ഒരു കിലോ കപ്പ തൊലി കളഞ്ഞു വൃത്തിയായി കഴുകി എടുക്കുക. അതിനുശേഷം ചെറിയ കഷണങ്ങൾ ആക്കി കുക്കറിൽ ഇട്ടു അര സ്പൂൺ മഞ്ഞൾപൊടിയും, പാകത്തിന് ഉപ്പും, വെള്ളവും ചേർത്ത് നന്നായി വേവിച്ചു വക്കണം. ഇനി ചൂടാറിയ ശേഷം വെള്ളം ഊറ്റി കളഞ്ഞു നന്നായി ഉടച്ചു എടുക്കണം.

ഇനി ഒരു കടായി അടുപ്പിൽ വച്ചു ചൂടാക്കി അതിലേക്ക് നാലു സ്പൂൺ വെളിച്ചെണ്ണ ചേർക്കുക. ഇനി ഒരു സ്പൂൺ ഇഞ്ചി, വെളുത്തുള്ളി പേസ്റ്റ് ചേർത്ത് നന്നായി വഴറ്റുക. ഇനി രണ്ടു സവാള പൊടിയായി അരിഞ്ഞത് ചേർത്ത് നന്നായി വഴറ്റുക. സവാള നന്നായി വാടി വന്നാൽ അതിലേക്ക് അൽപ്പം കറിവേപ്പില അരിഞ്ഞത്, രണ്ടു പച്ചമുളക് അരിഞ്ഞത് എന്നിവ ചേർത്ത് വഴറ്റുക.

ഇനി അതിലേക്ക് കാൽ സ്പൂൺ മഞ്ഞൾപൊടി, അര സ്പൂൺ മുളക്പൊടി, അര സ്പൂൺ കുരുമുളക്പൊടി, ഒരു സ്പൂൺ ഗരം മസാല എന്നിവ ചേർത്ത് നന്നായി വഴറ്റണം. പൊടികളുടെ പച്ചമണം മാറി വന്നാൽ അതിലേക്ക് പുഴുങ്ങി പൊടിച്ചു വച്ചിരിക്കുന്ന കപ്പ ചേർത്ത് നന്നായി മിക്സ്‌ ചെയ്യണം. ഇനി അൽപ്പം മല്ലിയില അരിഞ്ഞത് കൂടി ചേർത്ത് നന്നായി മിക്സ്‌ ചെയ്യുക. ഇനി ത൭ ഓഫ് ചെയ്തു ചൂടാറാൻ വേണ്ടി മാറ്റി വക്കണം.

കപ്പ ചൂടാറിയ ശേഷം ചെറിയ ഉരുളകൾ ആക്കി വക്കണം. അതിനു ശേഷം കട്ലെറ്റിന്റെ ഷേപ്പിൽ തയ്യാറാക്കി വക്കണം. ഇനി രണ്ടു സ്പൂൺ മൈദ അൽപ്പം വെള്ളത്തിൽ കലക്കി വക്കണം. അൽപ്പം ബ്രെഡ്‌ ക്രംസും റെഡി ആക്കി വക്കണം. ഒരു കടായി ചൂടാക്കി മുക്കി പൊരിക്കാൻ ഉള്ള ഓയിൽ ചേർക്കുക. ഇനി ഓരോ കട്ലെറ്റും എടുത്തു ആദ്യം മൈദ മിക്സിൽ മുക്കി ബ്രെഡ്‌ ക്രംസിൽ പൊതിഞ്ഞു ചൂടായ എണ്ണയിൽ ഇട്ടു വറുത്തു കോരുക. ഇപ്പോൾ നമ്മുടെ അടിപൊളി “കപ്പ കട്ലറ്റ്” തയ്യാർ… !! ടൊമാറ്റോ സോസിന്റെ കൂടെ അടിപൊളി കോമ്പിനേഷൻ ആണ്.

https://www.youtube.com/watch?v=N6KoBD2TtoE