സൂപ്പർ ടേസ്റ്റിൽ മുട്ട തീയൽ റെഡി ആക്കാം ചോറിന്റെയും, ചപ്പാത്തിയുടെയും കൂടെ അടിപൊളി കോമ്പിനേഷൻ

മീനും, ഇറച്ചിയും കിട്ടാത്ത സമയത്തു മുട്ട തന്നെ ശരണം. അപ്പോൾ മുട്ട തീയൽ തയ്യാറാക്കിയാൽ ചോറിന്റെ കൂടെ അടിപൊളിയായി കഴിക്കാം. എല്ലാവർക്കും ഈ ടേസ്റ്റ് ഇഷ്ടമാകുകയും ചെയ്യും. അപ്പോൾ വളരെ എളുപ്പത്തിൽ എങ്ങിനെ ആണ് മുട്ട തീയൽ തയ്യാറാക്കി എടുക്കുന്നത് എന്ന് നോക്കാം.

ആദ്യം അഞ്ചു മുട്ട നന്നായി പുഴുങ്ങി വക്കണം. അതിനു ശേഷം തോട് പൊളിച്ചു കളഞ്ഞു മാറ്റി വക്കണം. ഇനി ഒരു പാൻ ചൂടാക്കി രണ്ടു സ്പൂൺ വെളിച്ചെണ്ണ ചേർക്കുക. അതിലേക്ക് അര സ്പൂൺ പെരുംജീരകം ചേർക്കുക. ഇനി അര മുറി ചിരകിയ തേങ്ങ ചേർത്ത് നന്നായി വറുക്കണം. രണ്ടു ചെറിയ ഉള്ളി കൂടി ചേർത്ത് വറുത്തു എടുക്കുക. ചെറിയ തീയിൽ വറുത്തു എടുക്കാൻ പ്രത്യേകം ശ്രദ്ധിക്കണം. ഇനി ചൂടാറിയ ശേഷം അൽപ്പം വെള്ളം ചേർത്ത് നന്നായി അരച്ച് എടുക്കണം. മറ്റൊരു പാനിൽ രണ്ടു സ്പൂൺ വെളിച്ചെണ്ണ ചേർക്കുക. അതിലേക്ക് അര സ്പൂൺ കടുക് ചേർത്ത് പൊട്ടിക്കുക. ഇനി ഒരു സവാള ചെറുതായി അരിഞ്ഞത്, രണ്ടു സ്പൂൺ ഇഞ്ചി, വെളുത്തുള്ളി ചതച്ചത്, രണ്ടു പച്ചമുളക് എന്നിവ ചേർത്ത് നന്നായി വഴറ്റുക.

സവാള നന്നായി വാടി വന്നാൽ അതിലേക്ക് കാൽ സ്പൂൺ മഞ്ഞൾപൊടി, രണ്ടു സ്പൂൺ മുളക്പൊടി, രണ്ടര സ്പൂൺ മല്ലിപ്പൊടി എന്നിവ ചേർത്ത് നന്നായി വഴറ്റുക. അതിലേക്ക് നമ്മൾ അരച്ച് വച്ചിരിക്കുന്ന അരപ്പും, രണ്ടു കപ്പ് വെള്ളവും ചേർത്ത് നന്നായി തിളപ്പിക്കുക. പാകത്തിന് ഉപ്പ് ചേർക്കാൻ മറക്കരുത്. ഇനി ഒരു തക്കാളി നീളത്തിൽ അരിഞ്ഞതും, അൽപ്പം കറിവേപ്പിലയും കൂടി ചേർത്ത് നന്നായി തിളപ്പിക്കുക. കറി തിളച്ചു കുറുകി വന്നാൽ അതിലേക്ക് പുഴുങ്ങി കഷണങ്ങൾ ആക്കി വച്ചിരിക്കുന്ന മുട്ട ചേർത്ത് നന്നായി തിളപ്പിക്കുക. കറി തിളച്ചു വന്നാൽ ഗ്യാസ് ഓഫ്‌ ചെയ്യാം. ഇപ്പോൾ നമ്മുടെ അടിപൊളി മുട്ട തീയൽ റെഡി…. !!