ചെമ്മീൻ കറി ഈ രീതിയിൽ തേങ്ങാ പാൽ ചേർത്ത് തയ്യാറാക്കി നോക്കിയിട്ടുണ്ടോ

ചെമ്മീൻ തേങ്ങാ പാൽ ചേർത്ത് കറി വച്ചാൽ സൂപ്പർ ടേസ്റ്റ് ആണ്. അപ്പോൾ സമയം കളയാതെ എങ്ങിനെ ആണ് കറി തയ്യാറാക്കി എടുക്കുന്നത് എന്ന് നോക്കാം. ആദ്യം അര കിലോ ചെമ്മീൻ തൊണ്ട് കളഞ്ഞു വൃത്തിയാക്കി കഴുകി എടുക്കുക. ഒരു മാങ്ങ തൊലി കളഞ്ഞു ചെറിയ കഷണങ്ങൾ ആക്കി വക്കുക.

ഇനി ഒരു പാൻ അടുപ്പിൽ വച്ചു ചൂടാക്കി അതിലേക്ക് നാലു സ്പൂൺ വെളിച്ചെണ്ണ ചേർത്ത് കൊടുക്കുക. ഇനി അര സ്പൂൺ ഉലുവ ചേർത്ത് പൊട്ടിക്കുക. അതിലേക്ക് ഒരു സ്പൂൺ ഇഞ്ചി വെളുത്തുള്ളി ചതച്ചത് ചേർത്ത് കൊടുക്കണം. വഴറ്റിയ ശേഷം രണ്ടു പച്ചമുളക് കീറിയതും, ഒരു സവാള അരിഞ്ഞതും, രണ്ടു തണ്ട് കറിവേപ്പിലയും ചേർത്ത് നന്നായി വഴറ്റുക. നന്നായി വഴറ്റിയ ശേഷം രണ്ടു സ്പൂൺ മുളക്പൊടിയും, ഒന്നര സ്പൂൺ മല്ലിപ്പൊടിയും, അര സ്പൂൺ മഞ്ഞൾപൊടിയും ചേർത്ത് നന്നായി വഴറ്റുക. പൊടിയുടെ പച്ചമണം മാറിയാൽ മാങ്ങ കഷണങ്ങൾ ആക്കിയത് ചേർത്ത് കൊടുക്കുക. ഇനി ഒന്നര കപ്പ് രണ്ടാം പാൽ ചേർത്ത് കൊടുക്കണം. മാങ്ങക്ക് പുളി കുറവാണ് എങ്കിൽ ഒരു കഷ്ണം കുടം പുളി ചേർത്ത് കൊടുക്കണം. ഇനി പാകത്തിന് ഉപ്പ് ചേർത്ത് കൊടുക്കണം. ഇനി നന്നായി തിളപ്പിക്കുക.

മാങ്ങ നന്നായി വെന്തു വന്നാൽ ചെമ്മീൻ ചേർത്ത് കൊടുക്കണം. ചെമ്മീൻ വെന്തു വന്നാൽ ഒന്നാം പാൽ ചേർത്ത് തിളപ്പിച്ച്‌ എടുക്കുക. നന്നായി എണ്ണ തെളിഞ്ഞു വന്നാൽ ഗ്യാസ് ഓഫ് ചെയ്യുക. ഇനി പാൻ അടുപ്പിൽ വച്ചു രണ്ടു സ്പൂൺ വെളിച്ചെണ്ണ ചേർത്ത് നാലു ചെറിയ ഉള്ളി അരിഞ്ഞത് ചേർത്ത് ബ്രൗൺ നിറം ആയാൽ കറിയിലേക്ക് ചേർക്കുക. ഇപ്പോൾ നമ്മുടെ അടിപൊളി ചെമ്മീൻ കറി തയ്യാർ… !!