മത്തി മുളകിട്ടത് ഇതുപോലെ തയ്യാറാക്കിയാൽ പാത്രം കാലിയാകുന്നത് അറിയില്ല

നമ്മുടെ ഈ കറിക്ക് അര കിലോ മത്തി വേണം.മ ത്തി നന്നായി കഴുകി വൃത്തിയാക്കിയ ശേഷം ചെറിയ കഷണങ്ങൾ ആയി മുറിച്ചു എടുക്കുക. ഒരു നെല്ലിക്ക വലുപ്പത്തിൽ പുളി വെള്ളത്തിൽ കുതിർത്തു വക്കണം. വാളൻ പുളിക്ക് പകരം കുടംപുളി ഉപയോഗിച്ചും നമുക്ക് ഈ കറി റെഡി ആക്കി എടുക്കാം.

ഇനി നമുക്ക് കറി റെഡി ആക്കാം. ആദ്യം ഒരു ചട്ടി അടുപ്പിൽ വച്ച ശേഷം ചൂടാക്കുക. മൂന്നു സ്പൂൺ വെളിച്ചെണ്ണ ഒഴിക്കുക.ഇനി അര സ്പൂൺ ഉലുവ ഇട്ട് പൊട്ടിക്കുക. അതിനു ശേഷം രണ്ടു സ്പൂൺ ഇഞ്ചി വെളുത്തുള്ളി ചതച്ചത് ചേർത്ത് വഴറ്റുക. അതിനു ശേഷം പത്തു ചെറിയ ഉള്ളി ചതച്ചത് ചേർത്ത് നന്നായി വഴറ്റുക.രണ്ടു തണ്ട് കറിവേപ്പില ഇട്ടു കൊടുക്കണം. നല്ല വണ്ണം വാടി വരുമ്പോൾ അതിലേക്ക് രണ്ടു തക്കാളി ചെറുതായി അരിഞ്ഞത് ചേർത്ത് നന്നായി വഴറ്റുക.

ഈ സമയത്തു ചൂട് നല്ല വണ്ണം കുറച്ചു വക്കണം. തക്കാളിയും ഉള്ളിയും നന്നായി വാടി വന്നാൽ രണ്ടു സ്പൂൺ മുളക്പൊടി, ഒന്നര സ്പൂൺ മല്ലിപ്പൊടി, അര സ്പൂൺ മഞ്ഞൾപൊടി, എന്നിവ ചേർത്ത് പച്ചമണം മാറുന്നത് വരെ വഴറ്റി എടുക്കുക. അതിനു ശേഷം പുളി വെള്ളം ചേർത്തു കൊടുക്കണം. ഇപ്പോൾ ആവശ്യത്തിന് ഉപ്പ് ചേർക്കാൻ മറക്കരുത്. പുളി നന്നായി തിളച്ചു വന്നാൽ അതിലേക്ക് മത്തി ഇട്ടു കൊടുക്കണം. മത്തി നല്ല വണ്ണം വെന്ത ശേഷം രണ്ടു തണ്ട് കറി വേപ്പില കൂടി ചേർത്ത് കറി വാങ്ങി വക്കണം. ഇപ്പോൾ നമ്മുടെ അടിപൊളി മത്തി മുളകിട്ടത് റെഡി. ഇത് ചോറിന്റെ കൂടെയും പൊറോട്ട, ചപ്പാത്തിയുടെ കൂടെയും അടിപൊളി കോമ്പിനേഷൻ ആണ്.